යහළු යෙහෙළියන්
අද Sumedha Nawarathne ලියපු පෝස්ට් එකකට අනුව මේ අදහස ලියන්නේ. ඈ මෙහෙම කියනවා
"නිකම් ඉන්න දරුවො සමලිංගිකත්වයට පත් කරන ගුරුවරුන්, ගුරුවරියන් හා විදුහල්පතිනියන් පිළිබඳ උපදේශන සැසිවලදී හෙලි වීම ඉතාමත් ශෝචනීය තත්ත්වයක්.
ගැහැනු දරුවො දෙන්නෙක් හොඳම යාළුවො විදියට ඉන්න පුළුවන්. කිසිම ලිංගික නැමියාවක් ඔවුන් අතර නැතුව.
බාලිකා පාසල්වල ගුරුවරියන් හා පරිපාලනය මේ තත්ත්වයන් පිළිබඳ ඉතා බුද්ධිමත් ලෙස කටයුතු කරන්න අවශ්‍ය වෙනවා."
ඔව් මේක ඇත්ත. මට මගේ පරණ පාසල් මතකයෙන් කරුණු කියන්න පුළුවන්. මං පාසල් ගිය කාලෙත් මං ඔයාට after කියන යාළුවෝ මට හිටියා. ඒ සම්බන්ධතා කියන්නේ පන්තියේ එක ළඟ ඉඳගෙන ඉන්න එක. කැන්ටිමට යනකොට එකට යන එක වගේ හරිම සුළු කාරණා. ඒ සම්බන්ධතාවල කිසිම ලිංගික නැමියාවක් නෑ. එහෙම ලිංගික සබඳතා තියෙනවා කියලා අපි දන්නෙත් නෑ. ඉතින් මේ after ලා තරහ වෙනවා මං වෙන යාළුවෙක් එක්ක වැඩිය කිට්ටු වුණොත්. තරහ වෙලා කාලයක් කතා නොකර ඉන්නවා. ආයේ යාළුවෝම එකතු වෙලා තරහ අය යාළු කරවනවා. හරිම සුන්දර අත්දැකීම් ඒවා. අපේ ගුරුවරු මේවා දැක්කද මන්දා. දකින්න දෙයක් නැතුවත් ඇති. ඔවුන් අපේ සබඳතා වලට උදැල්ල දැම්මේ නෑ. මේ දේවල් සාමාන්‍ය පෙළ පන්ති දක්වා විතරයි.
උසස් පෙළට එද්දී අපි හුඟක් අයට පෙම්වතුන් හිටියා. ඒවා පාසලට අහු වුණොත් නම් හෙන කේස්. එහෙම වෙන්නේ ඉතින් අනුවණ කමෙන් තමයි. එවිට අපි ටිකක් විතර පරිණත වෙලානේ. ඉතින් සූක්ෂම විදියට ඒවා රහසිගතව තමයි පවත්වාගෙන ගියේ. ඇත්තටම ඒවත් ලියුම්, ලේන්සු හුවමාරුවකට වඩා දුරදිග ගිය ඒවා නෙවේ.
ඒත් අපි හොඳම යෙහෙළියෝ එකට එක කාමරයේ පාඩම් කරනවා. එක ඇඳේ නිදාගන්නවා. කිසිම ලිංගික නැමියාවක් නෑ. ඒ සොඳුරු මිතුදම් අදටත් සුරැකිව තියෙනවා.
සුමේධා කියන ආකාරයට අද පාසල් පරිපාලනය මේ විදියට ළමයි අපහසුතාවට පත් කරනවා නම් ඒ ගැන හරිම කණගාටුයි.
