වැඩ අතර නිදි කිරා වැටීම

 වැඩ අතර නිදි කිරා වැටීම

කාර්යාලයක කාන්තාවක් වැඩ කරන අතරේ නිදි මතේ හිස කඩා වැටෙන වීඩියෝ එකක් share වෙනවා. රජයේ සේවකයන් එක්ක තීයෙන ඇරියස් එකයි කාන්තාවන් රැකියා කිරීම ගැන තියෙන තරහයි ඔක්කොම එක්ක ඒ වීඩියෝ එක යටින් කමෙන්ට් වැටිලා තියෙනවා. ඒ වගේම කියන්න ඕන රජයේ සේවකයන් හුඟක් ගැටලු හදා ගන්නේ නිදා වැටීම නිසාම නෙවේ. සන්නිවේදන දුර්වලතා නිසා. තමාගෙන් සේවය ලබා ගන්නා එන අයට ප්‍රසන්නව කතා කිරීමෙන් වගේම සිනාවකින් සංග්‍රහ කිරීමෙන් ඇතැම් ගැටලු විසඳා ගන්න පුළුවන් වුණත් රජයේ සේවකයන් හුඟක් අයට නැත්තේම ඒ කුසලතාවය මයි. එයාලගේ මුහුණු කජු ලෙලි වගේ. සමහර රාජ්‍ය බැංකු වලක් මේ තත්ත්වය තියෙනවා. එයාලගේ සල්ලි අපි ගන්න ගිහින් වගේ හැසිරෙන්නේ.

ඉතින් අර කී වීඩියෝ එකේ ඇත්තටම ආසාවෙන් වුවමනාවෙන් ඈ නිදි කිරා වැටෙනවා වෙන්න බෑ. නිදිමත මානව අවශ්‍යතාවයක්. ඒත් කන්තෝරු ඇවිත් නිදාගන්න නම් බෑ. ඒක හරි.

නමුත් කාන්තාව මේ තත්ත්වයට මුහුණ දීම පිළිබඳව ඇත්ත තත්වය මෙහෙම වෙන්න පුළුවන්. ගෙවල්වල මෙහෙකරුවන් නැත්නම් රෑ තිස්සේ කලින් දවසේ දරුවන් ඇතුළු සැමගේ වැඩ ඉවර කරලා ආයේ උදේ පාන්දර නැගිටලා උයලා පිහලා තේ හදලා දරුවන්ට සැමියාට කෑම ගෙන යන ඒවා සකස් කරලා තමයි කාන්තාවන් හුඟක් අය වැඩට එන්නේ.

මටත් මේ අත්දැකීම තියෙනවා. කුදු මහත් වැඩ ඉවර වෙලා අන්තිම විනාඩි පහේ තමයි යාර හයකුත් පටලවාගෙන බස් එකට දුවන්නේ. හැබැයි අපට ගුරුවරු හැටියට මොන විදිහට වත් පාසලේදී නිදි කිරාවැටෙන්න නම් බෑ. ඒක වෙන්නෙම නෑ. අසනීප නම් ස්ටාෆ් රූම් ඇවිත් පොඩ්ඩක් ඔළුව ගහගෙන ඉන්න වෙලාවල් තියෙනවා.

හැබැයි මට එක වාසියක් තිබුණා. බස් එකෙ එන අතරේ ඉඳගෙන එන නිසා විනාඩි විස්සක් නිදාගන්න පුළුවන්. සමහර දාට බහින තැන පහුවෙලත් තියෙනවා.

තව එක අමාරුම අවස්ථාවක් තමයි උත්තර පත්‍ර බැලීමේ දී එන නිදිමත. එක දිගට කියවන කොට ඒ නිදිමත ආවම මං නම් ඇත්තටම පොඩි වෙලාවක් නිදාගන්නවා. ඊට පස්සේ ආයේ වැඩ කරනවා. මොකද ළමයෙකුගේ ජීවිතය නේ පිළිතුරු පත්‍ර කියන්නේ. ඒවා හරියටම බලන්න ඕන. අපේ අතින් වැරදි වෙන්න බෑ.

තව දෙයක් තමයි තමන්ට අසාමාන්‍ය විදිහට නිදිමත එනවා නම් හෝමෝන අසමතුලිත තා වෙන්න පුළුවන්. ඒ ගැනත් මේ වගේ නින්ද යන අය සැළකිලිමත් වෙන්න ඕන.