මේපල් ගස

 මේපල් ගස

මේපල් ගස ගැන ඔබ අසා ඇතිවාට සැකයක් නැහැ. අඩු තරමින් මේපල් කොළය ගැන නොදන්නා කෙනෙක් නැතුව ඇති. ඒ එය කැනඩාවේ ජාතික ධජයේ සංකේතය නිසා. එහි රතු පැහැයෙන් බලාපොරොත්තුව, සශ්‍රීක භාවය, ශාන්තභාවය හා මධ්‍යස්ථභාවය සංකේතවත් කරන බවත් රටාවෙන් සංස්කෘතික උරුමය හා ස්වාභාවික සම්පත් නිරූපණය වන බවත් කියනවා.

මේපල් කියන්නේ ඇත්තෙන්ම Acer ගණයට අයත් විශේෂ දළ වශයෙන් 125 ක් පමණ අයත් ශාක වලට කියන පොදු නමක්. බොහෝ විශේෂ ගස් මීටර් 10-40 දක්වා උස ගස් වශයෙන් හැදෙනවා. ඇතැම් ඒවා එතරම් උසක් නැති පඳුරු ලෙස වැවෙනවා. මේවා බොහොමයක් ආසියානු කලාපය නිජබිම කරගෙන ඇති අතර සමහර ඒවා යුරෝපය උතුරු අප්‍රිකාව හා උතරු ඇමරිකාව ආශ්‍රිතව දකින්න පුළුවන්. බොහෝ විශේෂ පතන ශීලී වන අතර කිහිපයක් සදාහරිත වෙනවා.

මේපල් මල් කුඩායි. ඒවා ශීත ඍතුව අග හෝ වසන්තයේ එළිපත්තේදී පිපෙනවා. ඇතැම් ගස්වල මල් පිපෙන්නේ පත්‍ර හැලීමටත් පෙර. සමාරාවක් වන මේපල් ඵලය 'හෙලිකොප්ටර්' 'මේපල් කී' ආදී නම් වලින් හැඳින්වෙනවා. රූපවල මේපල් ගස් ශරත් සමයේ තිබූ ආකාරය, මල් හා ඵල දක්වා තිබෙනවා.