ළපටි

 

ළපටි

කිංකිණි සිනා නද

කෙළිදෙලෙන් නගන

කෝමල කතා බහ මැද

සෙල්ලම් පිටියකි එදා

තිබුණෙම මුළු ගෙදර

නැත උච්චාසන මහාසයන

ලී පුටු හතරකි තිබුණ

වරින් වර පිරියම් කරන

හරවා අනෙක් පස

වසා සරසා සාරි වලින්

සැදුනේය සොඳුරු මන්දිර

කුමර කුමරියන් මන්දිර තුළ

මීවන හාල් මැස්සන්

සුනු සහල් බතට කදිමට

වදමල් සිසිල් පැන්

පුරවා බෝතල් වලට

වෙන කුමට රස බොජුන්

නිදා ගත්තේ තනා සිරි යහන්

කොට්ට මත ඇඳ රෙදි එළාගෙන

මන්දිර තුළ අතොරක් නැතුව නිතර

තිබුණත් මිහිරි තුටු පහටු අන්දර

අයිතිය ගැන දේවල්වලට අතරින් පතර

නොතිබුණෙත් නෑ ගුටිබැට අඬ දබර

කාලයේ විහඟ පෙළ ගොස් පියා සල සල

කුමර කුමරියන් ද වැඩී උස් මහත්වූ කළ

නිවසේ පිටුපස අයිනකට වී කඳුලු සල සල

තිබුණා නටබුන් කැබලි එකින් එක මන්දිර වල

හිනැහී සෝෆා සැටි ඇවිත් එබුණා දොරකඩින්

තව තව විසිතුරුත් විත් අරක් ගත්තා මැදින්

තිර වලින් වැසුනා ඇතුළ නොපෙනෙන ලෙසින්

ඒ සොඳුරු සිනා කැන් කෝ අනන්තෙට පාවී ගිහින්

Thanks to Polesie Toys for the image on Pexel

මල්

 මල්

හිරු සමග පාන්දර හිනැහෙන

සඳු සමග රැයේ මුත් නැළවෙන

මද නලට රහසේම මුමුණන

පිපුණු තැනදිම මිසක්

වෙන කොහෙද තියෙන්නේ

මලක ඇත්තම ලස්සන!

මල් නෙලන් සමනලුන් අඞවා

ගෙන ඇවිත් බඳුන් තුළ පුරවා

ලස්සනක් සෙව්ව මුත් රිදවා

මලක දුක දුටුවේම නැතුවා!

පුදසුනක පර වෙන්න පැතුව

පර වෙලා විසිවෙන්න හිතුව

මල් කොහෙද තිබුණෙ විකසිතව

ඇයි තාම තේරුණේ නැතුව!

මල් පෙතිත් සුමුදු මුදු ඇතී

මදු පිරී සුවඳ විහිදෙන නිතී

කවුරුවත් දන්නෙ නැතුවැතී

මල් වුණත් පැතූ පැතුමක් ඇතී!