රෝස මලේ නටුවෙ කටු .......

රෝස මලේ නටුවෙ  කටු .......

මල් ලොව රැජිණ රෝස කිව්වොත් ඔබ මා සමග එකඟ වේවි. රෝස මල් සුන්දරයි. රෝස පෙති කොයි තරම් සුමුදුයි ද? රෝස මල සිප ගන්න. ඔබට එහි මිහිරි සුවඳ දැනේවි. රෝස පෙති ඔබේ මුහුණට හාදු දේවි ....සුමුදු මුදු පහසින් ඔබ මන්මත් කරමින්...

" රෝස මලේ නටුවෙ කටූ  ....."

මම මේ කවිය කී සැරයක් ගායනා කරල තියෙනව ද ? පොඩි දරුවෙක් කාලෙ  ව්තරක් නෙමෙයි අපේ පොඩි දරුවො නලවන්න,ලොකු පුතා ...දෝණි ..චූටි බබා  ඒ කොච්චර ඉස්සර ද ? ඊට පස්සෙ සුදු දෝණි අපේ පළවෙනි මිණිපිරී ..  ..ඊළඟට සනු, චූටි මිණිපිරී  ...ඇලෙක්ස් පුතුට තමයි වැඩියෙන්ම කියන්න ඇත්තෙ . නයිල් බබුට එය ගායනා කරන්න වුණේ නෑ . ඒ පැටියත් එක්ක මට ගත කරන්න ලැබුනෙ සතියයි නෙ ? එයාට මම ගායනා කළේ "රන්වන් පාටයි සමනලයා ....."

නටුවෙ කටු තිබුණට කමක් නෑ කියලනෙ සමනලයත් හිතුවෙ ...ඒකනෙ "නටුව නොවේ මල සිඹිමී " කිව්වෙ .

මම අපේ ගෙදර රෝස ගස් කීපයක් වැව්ව බැල්කනියෙ පෝච්චි වල. එක බේබි රෝස පැළයක් ලැබුණේ නන්දා මිස්ගෙන්. නන්ද මිස් වගාවට දක්ෂයා . පරිසර වැඩසටහන් වලදී අඳුනගත්ත මිතුරියක්  .ඒ රෝස පඳුරේ මල් එක සැරේට පණහක් විතර පිපුණා . ඒත් කාලයකට පස්සෙ මම ආපසු එන විට රෝස පඳුර මැරිලා ,ඉපල් විතරයි ඉතුරු වෙලා තිබුණෙ.

”ආච්චි අම්මේ අපි ආයේ රෝස පැලයක් ගේමු”

සුදු දෝණි කිව්ව . මම රෝස ඉපල් වලට වතුර දැම්මා . පැළයක් මතුවුණා. සුදු දෝණි හරියට සතුටු වුණා . මල් පිපෙන කම් බලා හිටියා . එත් අවාසනාවට ඒ රෝස පැළය මැරුණා.

සුදු රෝස මලක් රතු වෙනකම් ඒකට රතු ලේ ගලාගෙන එන්න රෝස කටුවකින් හදවත සිදුරු කර ගත් නයිටින්ගේල් කුරුල්ලා ගැන ඔස්කා වයිල්ඩ් ලියූ කතාව ඔබත් සමහර විට අසා ඇති.  එදා රෑ ආදරයේ අවසන් ළයාන්විත ගීය ගැයූ කුරුල්ලා පපුවේ ඇනුණු රෝස කටුවත් එක්ක අවසන් හුස්ම හෙළා තණ පත් මත මැරී වැටුණ. එත් ඒ කුරුල්ලා බලාපොරොත්තු වුණු,ගායනා කළ  

මගේ බේබි රෝස පඳුර

ආදරය ලෝකයේ තිබුණෙ නෑ නේද? ඒකනෙ අන්තිමේ ඒ වටිනා රතු රෝස මල කාණුවකට විසිවුණේ. ඒ ආදරණීය කුරුල්ලා ගැන කවුරුවත් බැලුවෙ නැහැ.

එක දවසක් අපිට සුපුරුදු බස් නැවතුම් පලක මැරිච්ච බල්ලෙකුගේ සිරුරක් කඩදාසියක් තරම් තුනී වෙනකම් එකේ උඩින් බස් රථ ගමන් කරලා මිනිස්සු ඇවිදලා තිබුණා මතකයි. ඉස්සර නම් එහෙම දෙයක් දැක්කම අඩු ගණනේ ඒක පාර අයිනෙන් වත් තියනවා,මිනිස්සු. මමත් ගෙඹි සිරුරු ,ගොළුබෙලි සිරුරු එහෙම උදේට පාරෙ අයිනෙන් තියලා යනවා.

දැන් මිනිස්සුන්ට ඒවාට වෙලාවක් නැහැ. මිනිස්සු දුවනවා....දුවනවා.....ඊළඟ පරම්පරාව ඊටත් හයියෙන් දුවනවා. කොහේද කොහේද අපේ ලොවක් සොයාගෙන. ඒත් ඒ ලෝකෙ කාටවත් තාම ලැබුණ බවක් පේන්න නැහැ.

එක් වැහිබර උදයක පාසැල අසල පාර හරහා කලුපාට ලොකු දළඹුවෙක් හෙමින් හෙමින් යනවා. උගේ රෝම මත පිනිබිඳු ඇමිණිලා දිලිසෙනවා.අපූරු දර්ශනයක්‌ . තව පොඩ්ඩෙන් වාහනයකට අහුවෙලා තැලිලා යයි කියන දුකට කොළයකින් අරන් පාර අයිනෙ පඳුරක් උඩින් තිබ්බ. එත් හවස එනකොට දැක්කා ඒ වගේ දළඹුවන් රැසකගේ චප්ප වූ සිරුරු. උපන්නොත් මැරෙනවා. කටුකුරුන්දේ අපේ හාමුදුරුවන් කිව්ව වගේ මරණයට හේතුව ඉපදීම.

රෝස මලේ සුන්දරත්වය විඳින්න නටුවේ කටු ගැන හිතන්න ඕන නැහැ. කැලිෆෝනියාවේ පිටුපස මිදුලේ දෝනියි ,සුපුන් පුතයි මායි එකතුවෙලා රෝස වැවුවා ගිය අවුරුද්දේ. අපි වෙළඳ පලින් රෝස පැල ගෙනත් හිටෙව්වා. මං ඒවාට පොහොර වතුර නොඅඩුව දැම්මා . මල් ගස් අපිට කළගුණ සලකන්න වගේ හොඳට මල් පුබුදුවල අපි සතුටු කළා. ශීත කාලේ ඒව ඔක්කොම නින්දට වැටෙනවා. ඊට පස්සේ නැවත ගිම්හානය ළඟා වෙද්දී දළු දාල මල් එනවා. මේ සැරෙත් මල් ලස්සනට පිපිලා තිබුන. දෝණි පින්තුර එවා තිබුණා.

 රෝස Rosaceae කුලයට අයිති ශාකයක්. Rosa තමයි රෝස වල ගණ නාමය. මේ ගණ නාමය යටතේ රෝස විශේෂ තුන්සියයක් පමණ තියෙනවලු. මේවා අතර වන දර්ශ මෙන්ම දෙමුහුම් විශේෂ ද රැසක් තිබෙනවා.

 රෝස ගණය උප ගණ (Sub genera ) හතරකට බෙදෙන බව සඳහන් 

වෙනවා.(Wikipedia ) ඒවායින් තුනකට අයත් වන්නේ රෝස විශේෂ කිහිපයක් පමණයි. වැඩිපුර විශේෂ ඇත්තේ Rosa කියන දර්ශීය උප ගණයට .

රෝස විශේෂ කිහිපයක් නම් : 

 1. Cabbage Rose (Rosa centifoli

 2. Tea Rose (Rosa odorata )

 3. Chinese Rose (Rosa chinensis )

 4. California Wild Rose (Rosa californica)

කැලිෆෝර්නියාවේ  මිදුලේ රෝස

රෝස වලට වෙළද පොළේ ඇත්තේ අධික ඉල්ලුමක්. රෝස වගාකර අපනයනය කරන ප්‍රධාන රට ඉක්වදෝරයයි. දෙවන තැන ගන්නේ කොලොම්බියාව. අපේ රටේ කදුකරයේත් කොච්චර හොඳට රෝස වැවෙනවද ?

මනාලියන්ගේ මල් කලඹටත් වැඩිපුරම ඉල්ලන්නෙ රෝස. හැබැයි සමහර මනාලියන් හැඩගන්වන අය රෝස මල් කළඹට මුදල් අරන් අන්තිමේදී දෙන්නෙ අරලිය මල් හරි වෙන මොනවා හරි. අන්තිම මොහොතෙ එපා කියන්නය.