කුහුඹුවනි තොප!

 කුහුඹුවනි තොප!

කුහුඹුවනි තොප

හිස්ව ගිය කුස්

පුරව ගන්නට

පැණි බිඳකට ඉව අල්ලමින්

අනවරත ගමනක යන

කුහුඹුවනි තොප

ඒ විඩාබර ගමන අතර

පාවහන් වලට

තැලි තැලී

පොඩි වෙවී

මැරි මැරී යන

මැරුණත් කිසිවකුටත්

වගේ වගකුත් නොවන

බලන්න අවට දෙනෙත ඇර

මේ එළඹ ඇති

සොඳුරු සුයාමය

යළිත් කිසිදා නොඑන

නෙක වර්ණයෙන්

වර්ණවත් කළ

සීනි දියකළ බඳුන්

ගෙන ඒවි උන් නුඹට

රැවටී බී මත් නොවුණ මැන

එවිට ලේසියි උන්ට

මත්වූ තොප

චප්ප කර දමන්නට

කුහුඹුවනි තොප

එකාමෙන් රොඳ බැඳගෙන

පාවහන් යටින්

එළියට විත් නොනිමි

නිදහස ලබා ගනු මැන!

සොඳුරු සුයාමයකි මේ

එය නැවත නොඑළඹෙන!