ගලන ගඟක ජීවිතය ඔබ පා කළා
සුමියුරු ගීත දහසක් අප වෙත රන්දා
වෙන්වී ඈත දුරකට ඔබ ගිය හන්දා
කාටත් හොරෙන් හිමිහිට හද ඉකි බින්දා
ගිය තැන ඉඳන් තව ගී ගයමුද නන්දා
බුදු හිමියන් පාමුල සමන් මල වෙලා
ගලන ගඟක ජීවිතය ඔබ පා කළා
කඩ මණ්ඩියේ වෙල අයිනේ දි හමුවෙලා
නැවතී බලනවද මොහොතකට තනිවෙලා
සෞම්ය සඳ කිරණ ඝන අඳුර පලවාවී
සුමුදු තරු ගිම්හානයේ එළිය දේවී
ඔබ ඔබේ පැලේ ඉඳ මිහිරි ගී ගයාවී
මම මගෙ පැලේ තනිව ඒ ගී ආසාවී
හද විල කලඹමින් රේඛා ඇඳේවී
කඳුලැල් වලින් අද ඒ විල පිරේවී
කුරුටු ගෑ ගී පොතේ පිටු ඉන් පෙඟේවී
ඔබේ රුව සිහිනයක ඇඳිලා පෙනේවී
අහස සේම ඔබ අනන්ත වන හින්දා
සයුර සේම ඔබ රැළි නඟනා හින්දා
නොනැවතීම ඔබ ගී ගයන හින්දා
සදාකල්ම ඔබ අප ළඟමයි නන්දා
මාලිනී හෑගොඩ
2026 අගෝස්තු 27 දින
කැලිෆෝනියාහී දීය.
No comments:
Post a Comment