ඇවිත් යන්න එන්න

හිම ඉඳිකටු ගත ඇනෙන
මේ සීතල ශිශිර ඍතුවේ
ඔබේ හිරිවැටුණු දෙපා
සතපන්න මෙහි එන්න

හදවත ද හිම වගේ
ගල්ගැසෙන රාත්‍රියේ
ඔබ ගයන  දුක් ගීතයේ
සිහින් හඬ මට ඇසේ

මේ කුටිය තාමත් උණුසුම්ය
දැන් ඔබේ මතකයෙන් ගිලිහී
ඈතින් ඈතටම ගිහින් ඇති
එදා විඳි ඒ උණුසුම් සුසුම්

සෙනෙහසේ ගින්දරෙන්
ඇවිල ගිය ගිනිදැල්ල
නොනැවති දැල්වෙන එළිය
ඔබට මග කියාවි කවුළු දොරෙන්

හිරු පායා එන ඇසිල්ලේ
හිනැහෙන සමන් පිච්ච මල්
ඔබ අතින් සිටවූ මල් වැලේ
අඩු නැතිව පිපෙනවා  අදටත්

එන්න ඔබ ඇවිත් යන්න එන්න
විඳින්න මේ මල් සුවඳ විඳින්න
තනිවූ පැල්පතේ හිඳ මා
මග බලන් ඉන්නවා  තාමත්

Photo by Vidar Nordli-Mathisen on Unsplash