දුම්බර වන රැජින

 

දුම්බර වන රැජින 

 

දුම්බර වන රැජින මීදුම්  සළුව වෙලා

සිටියා මග බලන් මුව මදහසිනි වෙලා

අප ගිය විටදි දුරු රට සිට වෙහෙස වෙලා

සංග්‍රහ කළා අප ගත සිසිලසිනි වෙලා

 

සිහිළැල් සුළං පහසින් පහස විඳ විඳ

ඇගෙ තතු සොයා ඇදුනෙමු ඈතට ඇවිද

ඇගෙ ගත සැරසු නිල්වන් තුරු ලතා මැද

ගතකළ දෙදින සැමදා සනසවයි හද

 

බැලු බැලු අතින් හැම තැන වෙනසකි ඇත්තේ

ඇගෙ වත දැකීමෙන් ඇති වීමක් නැත්තේ

නොසැලෙන බැඳීමකි ඇය ගැන හට ගත්තේ

කඳුලකි ඇසට ඇසු විට දැන් ඇගෙ තත්තේ 

 

දුම්බර රැජින ඇගෙ දුක සිත යට හංගා

සිටියත් කඳුළු ඇගෙ දෙනෙතින් පැන නැංගා

පෙන කැටි නගා ගල්කුළු අතරින් රිංගා

රට සරු කරන් දසතින් බැස යයි ගංගා

 

මොහොතක අප ඇවිද ගිය අඳුරු වන පෙත

ඊළඟ මොහොතෙ පතනට අප පැමිණ ඇත

කඳුකර වනය ඇඹරුණු ගස් සුළං පෙත

පුදුමෙකි මෙතැන එක වරුවක ගැටෙන නෙත

 

කරුවල, ඇටඹ, මිල්ල ද නෙක රුක් පේළී

ඒ රුක් කඳන් මත ඇත ලයිකන පේළී

උඩවැඩියා ද ඒ අතරේ පෙළපාලී

මීමන නම් තිබුණෙ වැසි නැතිදා වේලී  

 

වියළුණු කොළ තට්ටු ඇත පාවඩ දාලා

ඒ මත ඇවිද යනවිට අප ලිස්සාලා

ඒ පාටටම සිටියා දරණේ දාලා

පොළොන් තෙලිස්සෙක් පොඩි හිස ඔසවාලා

 

දුම්බර එකළු කරවන මහ අලි ඇත්තූ

දැන් දැන් එතැයි අප හදවත් විය පත්තූ

ගම්වැද විටෙක අලි කලිබල කර ගත්තූ

මිනිසුන් නැති ලොවක අවිහිංසක සත්තූ

 

සුළං කපොල්ලද පසුකර ඉන් බේරී

නැංගා රිවස්ටන් දුර්ගය දඟ කාරී

ඒ වන් අත්දැකීමක් පෙර නැත තේරී

දුම්බර වනපෙතේ අසිරිය මනාහරී

 

ලෝක උරුම සම්පත පිටවල පතන

පුංචි ලෝකාන්තය ඇත්තේ එතන     බලන්

පසුකර ඇවිද යනවිට මේ ලෙස සිතෙන

මේ වගෙ තැනක් ලොව තුළ ඇත්තේ කොතන

 

 

නිල්, කහ,තැඹිලි, රතු, රන්වන් පාට පිරූ

සුන්දර සුමුදු තටු සලමින් අහස සැරූ

තුඩ තුඩ නගා මල් නොතලා පැණි ද ඉරූ

සමනල රෑන් වන අසිරිය කරති සරූ

 

දින දෙක ගෙවී වන රැජිනිය තුරුලෙ හිඳ

විඳ විඳ සොඳුරු රුව මනකල් ඇතුළු හද

එන්නට සිදු වුණාකඳුලකි   දෙනෙත මැද 

එන්නෙමු නැවත ඔබ සුව දුක් දකින ලෙද

 

මේ පණිවිඩය කියවා අප රටේ දන

වන සම්පතේ වටිනාකම තරම දැන

මතුපරපුරට මේ අසිරිය දකින පින

අත් කරදීම යුතුකම බව සිතනු මැන